श्रीगुरुपादुकापञ्चकम्

ॐ नमो गुरुभ्यो गुरुपादुकाभ्यो
नमः परेभ्यः परपादुकाभ्यः ।
आचार्य-सिद्धेश्वर-पादुकाभ्यो
नमो नमः श्रीगुरुपादुकाभ्यः ॥ १॥
ऐङ्कार-ह्रीङ्कार-रहस्ययुक्त -
श्रीङ्कार-गूढार्थ-महाविभूत्या ।
ओङ्कार-मर्म-प्रतिपादिनीभ्यां
नमो नमः श्रीगुरुपादुकाभ्याम् ॥ २॥
होत्राग्नि-होत्राग्नि-हविष्य-होतृ
होमादि-सर्वाकृति-भासमानम् ।
यद्ब्रह्म तद्बोधवितारिणीभ्यां
नमो नमः श्रीगुरुपादुकाभ्याम् ॥ ३॥
कामादिसर्पव्रजगारुडाभ्यां
विवेकवैराग्यनिधिप्रदाभ्याम् ।
बोधप्रदाभ्यां द्रुतमोक्षदाभ्यां
नमो नमः श्रीगुरुपादुकाभ्याम् ॥ ४॥
अनन्त-संसार-समुद्रतार-
नौकायिताभ्यां स्थिरभक्तिदाभ्याम् ।
जाड्याब्धि-संशोषण-वाडवाभ्यां
नमो नमः श्रीगुरुपादुकाभ्याम् ॥ ५॥

इति श्रीगुरुपादुकापञ्चकं सम्पूर्णम् ।